June 6, 1475

Guglielmo Pagello to Johannes Hinderbach

Copy: Archivio di Stato di Trento, Archivio Principesco-vescovile, Sezione latina, capsa 69, n. 12, cc 1r-1v. Double paper sheet in good conditions copied by the episcopal secretary Giovanni Verber.

Reverendissime in Christo Pater et Illustrissime Domine, voluit summus Deus, religiosissime antistes, ut Tua in religionem christianam ardentissima fides, quam ab ineunte aetate prae Te tulisti, et quam divo Caesari nostro, et pluribus summis pontificibus, saepius palam declarasti evidentissimis etiam et miraculis signis, universo orbi palam fieret, ne quid ad consumatam laudem et gloriam tuam, qua caeteros mortales excellis deesse videretur.

Voluit, inquam, divina clementia te praeside, te duce, labentem devotionem christianam ac ignaviam nostram prope inclinam, non modo excitari, sed etiam in pristinum laudis statum et gloriae titulum restitui. Iam diu martyrum divinus ille fervor, ita nostris exigentibus pietatis evanuerat. Iam diu celeberrima illa martyrum corona intermissa erat. Solus in civitate Tua Tridentina innocentissimus Symon dignus visus est, qui sanguine suo hoc tempore et prolapsa fide, non loquendo sed moriendo erigeret, et martyrii gloriam crucis patibulo augeret et tu tanquam vicarius Iesu Christi effusum sanguinem innocentissimum a nephanda iudeorum truculentissima perfidia expeteres.

Sapientissime igitur Dominationis Tuae erit talem se in hac re exhibere, ut katholicis tuis christicolis presidio et ornamento perfidis vero et immanissimis hebreis terrori et formidini futurus sis. Quom solum pietatis genus sit in hac re esse crudelem, ut tamen aliquid certius ex gravissima et Sanctissima Dominatio Tua habere possim, et presertim de devotissimis et mirandis signis que in dies meritis istius gloriosissimi martyris coruscant.

Mitto | hunc Brutum servitorem meum, cui dignabitur Reverendissima Dominatio Tua aliquid litterarum ad me dare, ut ex templo ad Reverendissimam Dominationem Tuam simul et hec divina signa visenda advolem. Vale meum sydus.

Ex Baccantiano nostro, tertio iunias nonas 1475.