October 31, 1476

Johannes Hinderbach to Francesco Sansoni

Copy: Archivio di Stato di Trento, Archivio Principesco-vescovile, Sezione latina, capsa 69, n. 74a, cc 10r-11v. Paper installment in good conditions copied by the episcopal secretary Giovanni Verber.

Iohannes Dei et Apostolice Sedis gratia episcopus Tridentinus, fratri Franci- sco Sampsoni ministro generali Ordinis Fratrum Minorum sancti Francisci, salutem.

Reverendissime in Christo Pater et Frater honorande, post commendationem. Accepimus litteras Vestre Paternitatis ad nos scriptas per venerabilem fratrem Iohannem Petrum ministrum provincie sancti Antonii de Padua ob causam visitationis conventus huius | ac reformationis monasterii Sancte Clare, et cetera. Quem, pro nostro erga religionem ipsam amore ac devotione, humaniter recepimus, et ea que in favorem operis illius necessaria nobis visa sunt, paterne avisavimus.

Verum quidem, alias super hoc unacum civibus nostris, qui in ea re magno zelo movebantur, scripsimus, operantes ambo loca Ordinis bene recta fore propter nonnulla scandula alias occursa ex malo regimine et custodia monasterii antedicti. Sed opere venerabilis fratris Christofori de Feltro in meliorem statum ea reduxit, cuius tam vita quam doctrina exemplaris ac religiosa extitit, quem Vestre quoquam Paternitati plurimum commendamus, rogantes ut idem a custodia sive gubernatione horum duorum locorum hic, vel saltem super intendentia, eorundem non ammoneatur.

Et nihilominus conventui feltrensi deserviat ubi etiam non parva benivolentiam civium habere dicitur et credimus utriusque loca satis commode et utiliter eum preesse et prodesse posse. Quicquid enim in favorem ordinis ac religionis facere potuimus hactenus non obmisimus nec minus in futurum promptiores erimus propter singularem Vestre Paternitatis et aliorum patrum Ordinis quem ad nos geritis et habetis caritatis affectum commendantes vobis ac ceteris patribus religionis vestre causam huius innocentis pueri et martyris nostri beati Symonis a perfidis istis hebreis olim hic habitantibus verissime crudeliter necati in contemptu et blasphemiam Domini et Salvatoris nostri ac Virginis gloriose matris Eius, et totius fidei katholice, quem Deus quottidie non cessat multis miraculis clarificare, prout legit, vidit et | audivit suprascriptus venerabilis pater minister sancti Antonii in processibus iudiciariis contra iudeos habitis nec non signis et indiciis ex devotione christifidelium innumerabilibus apud tumbam eiusdem beati innocentis hic appensis et affixis.

Cuius sacrum corpusculum ad videndum oculis et palpandum atque contrastandum manibus copiam fecimus ac nonnullas eius reliquias Vestre Paternitati pro singulari munere presentandas dedimus, qui singula hic per eum et socium eius visa, cognita et intellecta, sicut non dubitamus fideliter referet pro informatione ac maiori certitudine Vestre Reverende Paternitatis, quam multo effectu rogamus ut causam ipsam sanctissimo domino nostro, quom ad pedes sue sanctitatis Vestram Paternitatem accedere contigerit, ceterisque patribus Ordinis tum precipue domino archiepiscopo Spalatrensem, vestro quondam in officio predecessori, qui alias in suo ad partes Germanie transitu hic nobiscum fuit, et se paterne et amice erga nos exhibuit suppliciter commendatam facere velit, ut sua sanctitas eandem pro honore Dei et incremento ac confirmatione fidei katholice, prout ex merito iustitie ac pio et iusto favore meretur non sic in longum cum scandalo multorum fidelium trahi ac suspendi permittat, sed quantocius fieri possit expedire dignetur.

Et hanc rem omni veritate submixam et toti mundo clarissimam et indubitatam huiusce modi frivolus ac nugolis iudeorum et suorum fautorum confictis mendatiis et presertim illius perversi fratris Baptiste, episcopi Vigintimilensem, non illius divine theologie, cuius se magistrum profitetur, neque Ordinis Predicatorum sancti Dominici, quem falso ac specietenus presefert professoris, sed perditorum hominum defensoris. Qui eos per falsos et corruptissimos testes pretio et auro conductos iuvare atque excusare, et hoc suum horrendum ac teterrimum facinus paliare conatur | minime obumbrari patiatur. Sed fidem et honorem Christi atque Passionis Eius insignia que in hoc innocente puero renovata sunt, ante oculos ponat et tam horrendam hebreorum perfidiam atque truculentiam execretur ac minime sic conniventibus oculis pertranseat, sed debitas super hoc provisiones faciat ac huius rei nocentes eorumque similes puniat aut puniri sinat, ne perfidi isti iudei de huiusmodi suo impiissimo scelere et execrabili superstitione impuniti evadant, aut contra christianam religionem se hanc pugnam obtinuisse glorientur.

Bene valeat Paternitas Vestra.

Ex arce nostra Boniconsilii, Tridenti, pridie kalendas novembris.