October 31, 1476

Johannes Hinderbach to Jacopo Zeno

Copy: Archivio di Stato di Trento, Archivio Principesco-vescovile, Sezione latina, capsa 69, n. 74a, cc 12r-12v. Paper installment in good conditions copied by the episcopal secretary Giovanni Verber.

Filius et servitor Iohannes antistes Tridentinus, Reverendissimo in Christo Patri et Domino Domino Iacobo Zeno antistiti Paduano salutem.

Reverendissime in Christo Pater et Domine honorande, post commendationem. Recepimus litteras Vestre Reverendissime Paternitatis per venerabilem fratrem ministrum provincie Sancti Antonii de Padua summe commendatorias et mihi quidem iocundissimas, quem pro reverentia et amore Vestre Paternitatis Reverendissime ac religionis humaniter ac iocunde suscepi. Et si qua ope nostra illi necessaria erat libenter fuissemus impartiti quamvis non magnopere in eis rebus pro quibus huc venerat nostrum adiutorium illi opus fuerit. Qui iam expeditis illis ad Vestram Reverendissimam Paternitatem ac ministrum generalem ordinis sui revertitur.

Hic rettulit mihi qualiter Vestra Paternitas multum huic rei et casui beati innocentis nostri affecta sit et devota propter quod illi corpusculum eiusdem et cetera lustranda et videnda dedimus | ac nonnullos processus contra iudeos habitos communicavimus ut hic omnia Reverende Paternitati Vestre ac ministri generali Ordinis ceterisque Christi fidelibus certius et oculatim referre posset dedimus etiam aliquam partem reliquiarum, hoc est indumentorum et partem de ampula sanguinis eiusdem innocentis, ut ea Vestre Paternitati Reverendissime ostendere et, si ei placuerunt, communifacere possit et debeat.

Commendantes nos et causam huius beati innocentis Vestre Reverendissime Paternitati, ad cuius vota me semper paratissimum offero, que feliciter in Domino valeat et mihi tanquam eiusdem Vestre Paternitatis Reverendissime filio et servitori in omnibus non rogando sed imperando precipiat.

Datum Tridenti in castro nostro Boniconsilii, pridie kalendas novembris, anno Domini 1476.