October 7, 1476

Johannes Hinderbach to Michele Carcano

Copy: Archivio di Stato di Trento, Archivio Principesco-vescovile, Sezione latina, capsa 69, n. 74a, cc 8v-9v. Paper installment in good conditions copied by the episcopal secretary Giovanni Verber.

Iohannes, Dei et Apostolice Sedis gratia antistes Tridentinus, fratri Michaeli de Mediolano Ordinis Fratrum Minorum de Observantia, eternam salutem.

Venerabilis ac religiose in Christo Pater honorande, allate nobis pridem fuere littere Paternitatis Vestre date Venetiis nono mensis transacti, licet aliquanto tardis nobis presentate, que nobis gratissime fuere propter singularem amorem et recordationem humanissime consuetudinis officii ac debiti nostri erga eandem Paternitatem Vestram quam profecto longe inferiorem fuisse fatemur, quam virtus eius et doctrina merebantur.

Gaudemus quidem de incolumitate vestra ac bonis successibus suis et profectu in opere et sermone Dei, quos sicut accepimus illic Venetiis, Verone et aliis in locis Vestra Paternitas utiliter et multum proficu<u>s disseminavit et multorum corda in veritate huius nephandi sceleris hic perpetrati titubantia corroboravit, adeo ut tote venete ac relique urbes longe aliter sentire videantur, quomodo hactenus pravorum suggestione satellitum iudeorum sententur, prout ex relatione quamplurium nobilium illius urbis ac etiam e nonnullorum ibidem qui hic causa devotionis accessere intelleximus et cognovimus. Deo laus et gloria, qui veritate katholice fidei sue non deserit, nec naviculam Petri procellosis fluctibus iudaice perfidie dimergi sinit.

Perge igitur optime pater et imperterrite verbi divini predicator, ut cepisti et veritatem ipsam tibi a Deo ostensam ubilibet locorum fidelium cordibus inserere ac | disseminare satage et lolium iudaice perfidie penitus extermina, ut seges optima in Ecclesia Dei succrescat et puritas fidei undique lucescat et impietas iudaica confundatur, presertim apud sanctissimum dominum nostrum et reverendissimos dominos cardinales ac ceteros prelatos Curie, quorum magis interest scire et intelligere huius rei veritatem que ad iniuriam Christi et Dei nostri, Eiusque gloriose Virginis matris ac orthodoxe fidei redundat, quam usque ad sanguinem, nedum propulsare deberemus, se etiam condignis penis ulcisci et vindicare pro Eiusdem fidei nostre amplificatione et corroboratione, sicut non dubitamus vestra potissimum interventionem ac exhortatione et gravissimo apud sanctitatem suam et alios testimonio facturum fore.

Accepimus iudeos qui huius rei illic curam agunt rediisse ad curiam cum novis frugibus ac muneribus duobus mulis oneratis, quibus corda hominum demulcere solent, ut fautores et studiosos rei sue in opere confirment, et alios quoque si quos poterunt donis corrumpant et pestem illam pestiferam maiori contagione sua commaculant.

Attamen speramus ac certissimum tenemus corda reverendissimorum Sancte Romane Ecclesie patrum et eorum maxime quorum auctoritate et integritate fides nostra veluti columpnis immobilibus subsistis hac peste minime succumbere, presertim si Paternitatis Vestre verbis ac sermonibus confirmentur quemadmodum suis litteris vobis spem firmam ac solidam in Deo et Eius virtute tribuit, in qua precipue speramus, neque deseremus hanc causam prout nos commonefacit Paternitas Vestra.

Mittemus enim propediem dominum Aprovinum nostrum huius sancte cause acerrimum pugilem ac sollicitatorem et forte alios cum eo qui | hanc rem prosequantur ac sollicitent summopere quamprimum reverendissimi domini cardinales consistorialiter cum papa conveniant, ut causa hec per relationem deputatorum dedicatur.

Interim, commendamus hanc piissimam et sanctam causam innocentini nostri Vestre Reverende Paternitati, et eius luculentissime doctrine et fideli testimonio et attestationi agnite veritatis, que bene ac feliciter valeat in Christo Iesu omnium salvatore. Datum Tridenti in castro nostro Boniconsilii, nonis octobris 1476.

Missa per Contum de Terlaco.

Cedula

illis ipsis diebus antequam littere vestre nobis reddite fuerunt de quondam maximo atque singularissimo miraculo in quodam paupere sed optimo homine nationis sclavonice. Hic, prope in montibus vincentinis, meritis et invocatione huius nostri beati innocentis occurso, qui incidens in latrones mille vulneribus confessus atque trucidatus ac sub tumulo lapidum tumulatus. Altera die, de morte resuscitatus et preter omnium spem pristine sanitati restitutus huc pro satisfaciendo voto suo quod in tanto periculo ac extremis suis emiserat advenit; quem cum litteris nostris hanc rem seriatim declarantibus ad vos misimus, qui nobis promisit Paternitatem Vestram ubicumque locorum in prosequi et sese eius conspectui cum dictis litteris nostris presentare ut eius horrenda vulnera et contusiones capitis sui oculis vestris intuemini, et hanc rem patenter ac coram omnibus predicare et manifestare positis ultra id quod hic presentialiter vidistis ad laudem et gloriam omnipotentis Dei et huius innocentis martyris sui.