November 14, 1476

Johannes Hinderbach to Angelo Fasolo

Copy: Archivio di Stato di Trento, Archivio Principesco-vescovile, Sezione latina, capsa 69, n. 74a, cc 19v-20r. Paper installment in good conditions copied by the episcopal secretary Giovanni Verber.

Iohannes Dei et Apostolice Sedis gratia antistes Tridentinus Domino Angelo episcopo Feltrino, salutem.

Reverende in Christo Pater et Domine, post commendationem. Intelleximus de gravi adcursa valetudine presbiteri Iohannis, unius ex curatis plebis Levigi; decrevimusque scribere Paternitati Vestre, sed quid humanitus illi accideret, ne cuiquam illam conferret aut committeret nisi persone nobis grate et accepte quemadmodum semper dicitur fuisse servatum et obtentum in eadem, et presertim tempore domini Iacobi Trop, novissimi capitanei nostri ibidem ac etiam tempore quondam predecessorum nostrorum bone memorie, aut castellanorum suorum ibidem existentium pro tempore.

Interea, venit ad nos nobilis vir Odoricus de Sergniano capitaneus noster Castri Silvae, et iurisdictionis ibidem qui dixit Vestre Paternitati Reverende scripsisse super hac re, habuisseque litteras responsales eiusdem quas nobilis exhibuit. Quibus visis et perlectis, vidimus et intelleximus optimam mentem ac dispositionem Eiusdem Vestre Paternitati erga nos; nihilque in ea ne disponere decrevisse preter intentionem et voluntatem nostram, ac de persona nobis grata et accepta, de quo multum contenti remansimus et quieti habentes multas gratias Vestre Paternitati, qui talem ac tantum respectum habuerit et habeat ad me tanquam Eius bonum | fratrem et servitorem, Eandem plurimum rogantes, quatenus occurrente casu vacationis huiusmodi quem Deus pro sua pietate diu avertat de eadem plebe et cura illius aliter disponere non velit aut alicui conferre nisi persone nobis ac dicte plebi grate et accepte, quomodo multa sunt que id pro interesse et iure nostro ibidem nobis et ecclesie ab antiquo tempore in temporalibus competenti requirunt et desiderant. In spiritualibus enim nihil iuri nobis in preiudicium Vestre Paternitatis et sue dicioni vendicamus. In eo Vestra Reverenda Paternitas nobis gratam et acceptissimam faciet complacentiam. In simili vel maiori vicissim gratissima retribuam.

Valeat Paternitas Vestra felix.

Ex arce nostra Boniconsilii Tridenti, die 14 novembris 1476.

Cedula

Reverende Pater, intelleximus postea quendam presbiterum de regno Apulie, qui nostram et vestram diocesis implent, capellanum ibidem practicasse cum illo aegrotante, ut sibi dictum beneficium resignaverit aut renuntiare proposuerit et nonnulli habitatores eiusdem ville, eiudem favere videntur ac etiam Odoricus castellanus noster ibidem, qui nobis incognitus est et novitius in eodem loco, et nescimus quibus moribus aut qua doctrina predictus sit. Omnes enim plerique | de dictis locis sunt ignari et incontinentes et tandem recedunt cum aliqua nota de diocesi vel eorum infamia detegitur, qua in partibus notati fuerant et coacti inde discedere, quare cautius circa illos superintendere oportet.

Sumus alias et nunc rogati a quibusdam civibus affinibus illis vestris feltrensibus pro quodam fratre magistri Bartholomei de Ballatis, civis vestri, Ordinis Sancti Francisci, magistro in theologia presbitero, qui superiori anno in obsequio nostro cum aliis oratoribus nostris in causa beati Symonis nostri Romam ivit et tota hyeme illic stetit et sibi et aliis pro capellano et aliis in multis servivit, ut eundem ad hunc locum, si vacaverit, dignaremur apud Vestram Paternitatem promovere. Cui pro dicti magistri Ravelonei  ac suis in hac causa meritis et bona diligentia facta, quantum in nobis est de eo beneficio, bene favemus et contenti sumus ut eidem per Vestram Paternitatem si et in quantum vacaverit conferatur.

Ipsumque ex nunc, quantum nostram interest et ad nos tanquam dominum dicti loci et castri in temporalibus spectat, eligimus et Vestre Paternitati presentamus, rogantes eandem affectuose quatenus dicto casu vacationis dicte cure eundem in dicto beneficio instituere et, ut moris est, benigne et gratiose nostro intuitu confirmare, non obstante resignatione aut renuntiatione suprascripta, si qua facta foret, aut etiam in futurum fieret tanquam suspecta et per impressionem aut suggestionem aut forte malitiam sue industriam aliquorum rusticorum facta. In eo nobis gratissime complacebit Vestra Paternitas, que bene valeat et nobis in simili et maiori re sibi complacentia precipiat et requirat.