November 6, 1476

Johannes Hinderbach to Michele Carcano

Copy: Archivio di Stato di Trento, Archivio Principesco-vescovile, Sezione latina, capsa 69, n. 74a, cc 14r-15v. Paper installment in good conditions copied by the episcopal secretary Giovanni Verber.

Venerabili ac Religioso in Christo Patri fratri Michaeli de Mediolano Ordinis Sancti Francisci Fratrum Minorum de observantia verbi divini predicatori famosissimo tanquam patri optimo, Iohannes Dei et Apostolice Sedis gratia antistes Tridentino, salutem perpetuam, cum plurima commendatione

Venerabilis ac religiose in Christo pater honorande, intelleximus pridem relatione Martini famuli nostri qui nuper Venetiis existens Vestram Paternitatem visitavit, et ea que sibi commisit nobis una cum litteriolis vestris fideliter rettulit. Que etiam per litteras vestras ac reverendi patris domini vicarii Ordinis, hesterna die nobis presentatas, licet dudum ante mensem date essent, luculentius intelleximus. Dolemus certe plurimum iter vestrum versus romanam Curiam intermissum fore, vel verius, ut credimus, horum pessimorum iudeorum et suorum fautorum studia et astutia impeditum.

Speramus tamen in Domino hanc vestram moram, favente Deo, in bonum ac melius profuturam, et verbum Dei per medium vestri plurimum fructum illic Venetiis allaturum, et corda multorum hoc presertim | adveniente sacro tempore, scilicet Adventus Domini ac quadragesimali, compunctura fore, quanquam ex litteris istis nunc habitis videamini hunc transitum vestrum propter suspicionem pestis, que circumquaque ubi Curia romana versatur invalescit intermisisse.

Timendum est ne sit plaga Dei immissa propter malos mores Curie et corruptiones ac iniquitates multorum honori Dei et fidei ac huic veritate apertissime tam inverecunde resistentium, que utinam non tangeret innoxios. Sed sicut in divinis libris legimus, sepe propter peccatum paucorum maxima multitudo plebis punita est, sicut in libris Regum et alibi reperitur. Attamen, divina iudicia nobis occulta et incognita sunt. Rogamus itaque Paternitatem Vestram quatenus certis reverendissimis dominis cardinalibus huius nostre cause beati Symonis patronis ac fautoribus quemadmodum se obtulit aliquid de his que hic vidisti et audivisti scribere velitis, precipue reverendo domino Reatino, domino Sancti Marci, Spoletino, Neapolitano et aliquibus aliis qui Vestre Paternitati noti sunt et benivoli.

Et si expedire videretur etiam sanctissimo domino nostro papae, aut his qui Vestre Paternitati magis placuerint, et litteras easdem huc ad nos aut ad romanam curiam procuratori religionis vestre et partibus in ara celi, qui easdem nomine vestro presentent, et forte melius erit, et minus suspecte videbuntur quam si per nostro presentarentur. Faciet enim in primis re Deo gratam ac meritoriam, et nobis quoque et toti civitati acceptissimam.

Bene valeat Paternitas Vestra, cuius ordinibus nos plurimum commendamus.

Cedula

Insuper, venerabilem fratrem vicarium provincie sancti Antonii plurimum saluere nostri parte iubemus, cuius littera dulcissimas | et omni suavitate unacum vestris accepimus, quibus in presentiarum propter repentinum huius latoris transitum respondere nequivimus; attamen, illi pro singulari virtute et humanitate sua multi affecti sumus. Cuius orationibus et omnium patrum et fratrum devotioni nos plurimum commendamus et vicissim offerimus.

Fuit hic nobiscum dominus Franciscus Tronus, olim Ripe provisor, cum multis aliis nobilibus venetis, qui se maxime devotum ostendit beati Symonis nostri, et pollicitus est nobis se deinceps velle esse predicatorem nominis eius, et testem huius rei contra perfidos illos tam in Senatu Veneto, quam aliis locis publice et privatim, quamquam alias huic rei, ut fatetur, contrarius fuerit et incredulus seque uti beatum Paulum quondam salvum primo persequutorem, sed modo propugnatorem huius pie ac sanctissime causae futurum, quem Deus in bono proposito suo confirmet et felicitet.

Cedula

Postquam Paternitas Vestra, sicut intelleximus, pro futura Quadragesima illic Venetiis mansura est, et illic verbi Dei predicatura, vellemus ut pater vicarius et alii aliquem ex vestris discipulis huc mitterent qui huic plebi nostre et civibus verbum Dei evangelizaret.

Erit enim nobis et toti civitati gratissimus et ceteris omnibus acceptior. Cupimus enim scire quid de Georgio illo sclavo qui beneficio huius nostri innocentis se pristine vite restitutum proclamat sequutum sit, et quo nam loco abierit; timemus enim ne illi perfidi eidem aliquas insidias parant aut ille ipsius occisor ac spoliator tendat pro tam atroci scelere eius obtegendo quemadmodum hic relatum est, quod illum in Valle Astie insequutus et quesierit. Queso avisate hominem, ut sit cautus et se precaveat ab insidia | et comitibus illis pessimis, quia non erit absque periculo.

Cedula

Distulimus hucusque mittere Aprovinum ex hac eadem causa que Vestra quoque Paternitatem illic detinuit, presertim quom sanctissimus dominus noster cum Curia sua nondum se firmaverit in aliquo loco omniumque iudicio creditur nihil in hac re futurum, nisi sua sanctitas se prius ad Urbem cum reverendissimis dominis cardinalibus et tota curia reduxerit et causarum strepitus suum cursum habeant. Super quo, si Paternitas Vestra aliquid novi illic Venetiis intellexerat, queso me facere dignetur per primum occurrentem avisatum.

Iterum bene valeat Paternitas Vestra.

Datum Tridenti in castro nostro Bonisconsilii, die sexta mensis novembris anno Domini 1476.