September 12, 1476

Johannes Hinderbach to Federico da Montefeltro

Copy: Archivio di Stato di Trento, Archivio Principesco-vescovile, Sezione latina, capsa 69, n. 69, cc 3r-4r. Paper installment in good conditions copied by the episcopal secretary Giovanni Verber.

Iohannes, Dei gratia antistes Tridentinus, domino Federico duci Urbinatensi salutem dicit.

Illustris et excelse Princeps et Domine honorande, post nostri commendationem et promptam in beneplacitum voluntatem. Intelleximus relatione venerabilis ac religiosi in Christo patris fratris Bartholomei Bellati | de Feltro, sacrae theologie professoris, Illustrem Dominationem Vestram prompto ac bono animo recepisse ac etiam intellexisse processus illos contra iudeos olim hic habitantes super occisione ac martyrio illius pueri beati Symonis nostri tridentini, in Parasceve ebdomade sacre, in contemptum et vilipendium et iniuriam, immo ad exemplum Passionis Domini et Salvatoris nostri Iesu Cristi, ac fidei nostre cristiane factis et commissis; deque ea re bene atque optime, prout talem ac tantum katholicum principem decet sensisse, ac non parum intra pietatis sue viscera commotum fore, eamque apud sanctissimum dominum nostrum atque reverendissimos dominos cardinales et commissarios huius cause ac canonizationis eiusdem beati innocentis sive declarationis super hoc ferende precipuam curam ac commendationem suscepisse.

Quapropter, Eidem Illustrissime Dominationi Vestre ad debitas ac meritas assurgimus atque referimus gratiarum actiones, Illustrissimam Dominationem Vestram orantes quatenus prefato sanctissimo domino nostro ac reverendissimis dominis cardinalibus nunc, ut fertur, in partibus Marchie ac non longe a terris ac locis Illustrissime Dominationis Vestre existentibus ac propter suspicionem pestis reductis, preces vestras in ea re apud sanctissimum dominum nostrum ac reverendissimos dominos cardinales interponere ac causam hanc tam piam atque devotam, sincero affectu, prefatumque fratrem Bartholomeum et alios oratores nostros huius cause sollicitatore<s> commendare velitis, ita ut optatum finem in ea consequi possumus, et non ita continuo in longum protrahatur, quom iam fere per annum in romana Curia versata sit, et per nullos fautores ac procuratores iudeorum, quibusdam falsis figmentis ac cavillationibus frivolis illam hactenus | per corruptiones et munera in longum protraxerint ac veritatem huius rei luce meridiana clariorem huiusmodi suis nugis obfuscare conentur, presertim quom haec causa piissima sit, et honorem Dei ac Salvatoris Nostri, Eiusque Gloriose Virginis et Matris Mariae, totiusque fidei katholice profectum ac confirmationem concernat et iudicare perfidie, confusionem eorumque pessimam at truculentissimam ac inveteratam in sanguinem cristianum consuetudinem abolitionem.

In eo, Illustrissima Dominatio Vestra in primis, Omnipotenti Deo et Eius Matri, necnon toti fidei christiane gratum obsequium, nobis autem singulares gratiam ac benivolentiam exhibebit, quam modis omnibus nobis possibilibus vicissim promereri et ad specialem laudem et gratitudinem atque indelebilem memoriam Vestrae Illustrissime Dominationis apud nos et hunc populum nostrum tridentinum adscribemus atque conservabimus. Et quemadmodum non dubitamus hic noster felicissimus ac merito glorificandus innocens martyr, singularem apud Deum et Dominum Salvatorem Nostrum, pro felici statu sui devotione et augmento eiusdem suis meritis et precibus impetrabit.

Bene valeat Illustrissima Dominatio Vestra et nobis vicissim si quid possumus in his partibus pro sui beneplacito imperat, et parati semper erimus ad ea posterius adimplenda.

Datum Tridenti in castro nostro Boniconsilii, die XII septembris 1476.