June 13, 1477

Michele Carcano to Johannes Hinderbach

Original: Archivio di Stato di Trento, Archivio Principesco-vescovile, Sezione latina, capsa 69, n. 98, c 1r. Paper sheet in decent conditions, with a few holes and ink stains, autograph of Michele Carcano.

Reverendissime ac Prestantissime Presul, salus immortalis in mellifluo Iesu.

Reverendissime Dominationi Tue nuperrime a venerando sacre theologie professore fratre Silvestro Ordinis Heremitarum cordiales ac amabiles Tue Serenissime Dominationi accepi litteras, que me immenso aspersere gaudio atque incredibili affecere leticia.

Tum, cum Clementissimam Dominationem Tuam erga me pauperculum cerno tanto fragrantem, tamve suavissimum tanquam denique cordialissimum concepisse amorem, quia veluti liquidum est mihi memoria mei fidelissimi servi tui nunquam a tuo archidiacono aboletur pectore. Tum cum te Prestantissimum Presulem in piissimam perspitio insudare atque fervere, tam illius videlicet tironis Christi Militis martiris Simonis qui hodie a fidelibus christicollis  ferme per universa mundi climata veneratur, collitur et adoratur, causa cuius veluti ego ipse a reverendissimo antistite huius Paduane Civitatis accepi et a sanctissimo domino nostro in brevi delucidanda atque universo orbi, cum ingenti plausu manifestanda, sicuti ipse ab uno canonicorum suorum firmissime habuit, qui noviter ab Urbe Romana se recepit.

Prefatus namque episcopus, ut michi asseruit sanctissimas prenominati infantuli martyris circa sextili mense reliquias est visitaturus. Non multa in presentiarum fidelitate Dominationis Tue calamo loquar, quia in brevi, favente Deo, maximo erit [....] sermono noster prolixior; transactis itaque aliquibus diebus post celeberrimam sancti nostri Antonii padovani solemnitatem Trivisum ac Feltrum me conferam per aliquos dies, ibi evangelizaturum. Deinde, ad Tuam Illustrissimam Dominationem velotius evolabo, teque dominum meum ac reverendum clerum atque devotum populum tuum consolaturus.

Vale in Domino mi Prestantissime Antistes, et vive felix confortare ac esto robustus quod dulcissimus Iesus in hac salutifera causa inexpugnabilis propugnator est tuus.

Iterum vale et valeant qui Serenissimam Dominationem Tuam valere desyderant et effectant, cui magnopere humiliter me commendo.

Ex cenobio nostro Sancti Francisci Padue, die 13 Iunii 1477.

Eiusdem Reverendissime Dominationi filius frater Michael de Mediolano Ordinis Minorum minimus.