April 26, 1478

Approvino degli Approvini to Johannes Hinderbach

Original: Archivio di Stato di Trento, Archivio Principesco-vescovile, Sezione latina, capsa 69, n. 122a, cc 1r-1v. Paper sheet in good conditions autograph of Approvino degli Approvini with sealing wax seal.

Reverendissime Pater et Domine mi colendissime, post mei devotam et humilem commendationem premissam.

Litteras Paternitatis Vestre Reverendissime ab astrologo reverendissimi domini Mantuani accepi cum certis picturis et litteras reverendissimi domini Sancti Vitalis, quas paternitati sue reverendissime in die Sancti Marci consignavi presente domino Bartholomeo Platina, qui multum commendavit causam hanc. Pergrate fuerunt littere Paternitatis Vestre Reverendissime, et se obtulit hac causa et aliis pro Paternitate Vestra Reverendissima omnes favores suos exhibere, et quod sanctissimus dominus noster bene dispositus erat et optat causam istam expediri cum tali gravitate et [....] quod nichil in futurum inputari possit sibi et Sedi Apostolice, et Dominatio Vestra Reverendissima magis canonizetur de bona iustitia et veritate huius cause.

Continue die noctuque solicito oportune et inportune; spero in brevi per Iacobum expeditionem dirigere et ante Pentecostes in despectum iudeorum cum suis falsis simulationibus, laus Deo, quod res sunt peracte; domini boni sed aliquando servitores ipsos eis iniusta perfraudit propterque multa exoriuntur scandala.

Ad factum banchariorum amplius nollunt expectare. Capere peccuniam in alio bancho nomine Paternitatis Vestre Reverendissime, hoc facere possem, si mandatum sufficiens haberem ad obligandum Paternitatem Vestram Reverendissimam, ut illorum mercatorum moris est. Scit Reverendissima Dominatio Vestra quod mandatum non habeo, nisi litteras curabo, quod adhuc bancharii patientiam habebunt usque per totum mensem maii. Si potero, interim disponat cum domino Ioanni Menichin de peccuniis vel de mandato sufficienti, et non negligat quia essem magna nota si Paternitatem Vestram Reverendissimam publicarent, et plus de hoc tempore quam alio tempore, et cetera.

Dominus Melchior per dies XX expectabit si dominus Ioannes veniet quidem sit autem in bancho ad interesse Paternitatis Vestre Reverendissime recipiet, et non libenter, sed necessitas hoc facere ipsum cogit. A<b> Abraam veronensi habui hucusque ducatos centum et triginta quinque computato pario domino Sambiensi [......] et pro me recepto diu de quibus dicit solum recepisse ducatos octuaginta et centum solvi debebant per totum mensem martii et residuum per totum mensem maii. Supplico agat quod contenti sint illi mercatores. Non spensas superfluas facio, et videbit Paternitas Vestra in computo.

Ad factum illius equi mittendi, domino cardinali palceret sed nimis annosus est, non deceret talem donum. Reverendissima Dominatio Vestra aliquando melius facet exponere liberaliter cardinali num causa lucrandi ducatum. Scio si in principio huius cause et etiam nunc habuissem ad faciendum aliquod munus causa dius fuisset expedita. Nemo vult gratis laborare; ymo sacerdos non tenetur dicere officium nisi habeat beneficium, nec vult dicere, et cetera, omnis sanctus vult offertorium. Diu promisseramus illum equum et unum cyphum domino auditori. Potius dabo meum, videlicet quem equito, quam verecundatus remanere, si aliter | facere non potero. Scio bene quod Paternitas Vestra Reverendissima est magnis angustis et profecto condoleo ac compatior Paternitati Vestre Reverendissime novit Deus. Parcat Omnipotens Deus illis qui in culpa sunt. Deus iustus iudex est, et cetera.

Si non placet quod non temptetur super canonizatione, sequar mandata Paternitati Vestre Reverendissime, quod non iam sit opus canonizationis, refferor me ad sapientiores suis. Certus quod illi qui persuadunt Paternitas Vestra Reverendissima non sint pueri, et quod bene intelligant utrum sit opus canonizationis et quando illud facere Paternitas Vestra Reverendissima coroboraret in perpetuum causam nostram quod nunquam haberet dubitare veniente quocumque alio pontifice et perpetua gloria et litteras apud Deum et mundum foret. Quia hanc expensam facere non posset Dominatio Vestra Reverendissima ex nunc magister Silvester Ordinis Sancti Augustini offeret se reperire duo milia; quid obesset si facerem comittere processum super examinatione miraculorum ad effectum canonizationis, tunc nemo posset aliquid temptare. Si bene Paternitas Vestra Reverendissima nollet ad ulteriori procedere et hoc [........] constabit obtinere istam commissionem super hoc responsum Paternitatis Vestre Reverendissime expectabo. Per dominum pergratum scribam alia. Nepos domini Nidertorer liber a lite sua erit, quia adversarius suus mortus est in diebus quatuor de mense martii. Mortui sunt hic mille ex pleuresi et ex alia causa. Deus custodiat vos longo tempore ad vota.

Ex Urbe, die 26 aprilis 1478.

Presentium lator fuit familiaris quando Iacobus infirmabatur commendo Paternitati Vestre.

Vestre Reverendissime Dominationi humilis servulus Aprovinus orator.