October 20, 1476

Jacopo Zeno to Johannes Hinderbach

Copy: Archivio di Stato di Trento, Archivio Principesco-vescovile, Sezione latina, capsa 69, n. 10, cc. 5r-7r. Paper quire in good conditions copied by the episcopal secretary Giovanni Verber.

Deditissimus Iacobus Zeno episcopus Paduanus Reverendissimo in Christo patri et Domino, Domino Iohanni Hinderbach dignissimo pontifici Tridentino mihi plurimum observando

Reverendissime Pater et Domine, Domine mi observandissime, debita commendatione premissa. Qui has reddet Reverendissime Dominationis Vestre est magister Iohannes Petrus Ordinis Minorum, reverendus minister in provincia hac paduana, Tridentum venit pro nonnullis rebus exequendis ad Ordinis sui dignitatem et commodum spectantibus, et quomodo in illis obeundis forte indigebit opera Reverendissime Dominationis Vestre et favore. Quom mihi suis singularibus meritis et eximia scientia ac virtute karissimus sit, existimavi mei esse muneris ut facerem illum commendatum Reverendissime Dominationi Vestre, cui sum vehementissime deditus observantissimeque affectus.

Quare quom pro suis meritis, tam non minus Vestre Reverendissime Dominationis quam mea causa, eum ita commendo Reverendissime Dominationis Vestre, ut maiori studio possim neminem. Est | dignus dilectione et patrocinio Reverendissime Dominationis Vestre. Quicquid igitur aut officii aut humanitatis in hunc venerabilem virum contulerit Dominatio Vestra Reverendissima id omnem me collatum arbitrabor. Hec magna cum fiducia exoravi Reverendissimam Dominationem Vestram, confisus in admirabili illius humanitate et excellenti bonitate quandoquidem ipse pro Reverendissima Dominatione Vestra aut benevolis suis quippiam agere non laboriosum mihi sed iucundissimum videretur.

Bene feliciterque valeat Reverendissima Dominatio Vestra, cui me semper offero et commendo.

Ex Padua, XX octobris 1476.