November 5, 1476

Johannes Hinderbach to Angelo Fasolo

Copy: Archivio di Stato di Trento, Archivio Principesco-vescovile, Sezione latina, capsa 69, n. 74a, cc 15v-16v. Paper quire in good conditions copied by the episcopal secretary Giovanni Verber.

Angelus episcopus Feltrinus Reverendo in Christo Patri et Domino Iohanni Dei et Apostolice Sedis gratia episcopo et Domino Tridentino benemerito Domino mihi honorando, Eiusdem Reverende Dominationis Vestre filius et servitor, et cetera.

Reverende in Christo Pater et Domine, Domine mihi honorande, quom Feltrum applicuerim et paulo ante e Curia venerim, oblata mihi nuntii opportunitate censui pro debito meo postquam corpore non licet ex temporis malitia meis saltem litteris Vestre Dominationis visitare. Fui in Curia romana apud Fulgineum per integrum mensem septembris cum reverendissimo domino cardinali Sancti Marci patriarcha nostro Aquilegiens<i>, ubi summus etiam pontifex residebat ibique quam diligenter perscrutari | volui, quo nam in statu esset causa illa gloriosi martyris Christi beati Symonis et quom cernimus esset statutus in mense octobris tunc futuro, nec ad illum usque diem recessus mei aliquis procurator pro sollicitanda fovendaque tam sancta et pia lite eo applicavisset, non potui non mirari et proinde statui meas ad Reverendam Dominationem Vestra dare. Quamobrem reverenter precor Eam velit quamprimum si hactenus non premisit dictum procuratorem Romam destinare qui causam ipsam continuo studio et sollicitudine sua operato fine concludat, non sciscitetur a me Vestra Dominatio causam quare ita fieri consulam, quia absque ratione non loquor. Unum tamen ad sui consolationem perstringam rem ipsam optime dispositam et inclinatam esse, Deo opitulante, adeo ut si vigilem habeat patronum minime dubitet Dominatio Vestra Reverenda victoriam ex ea cum magna laude et honore suo consequuturam, quom inter tot disturbia et malorum hominum machinationes ipse Dei Filius causam sui tyronis et agere et defensare videatur. Hoc tamen sepultum esse velim penes Vestre Dominationis, ne iis incommodetur, qui et voto nostro honestissimo favent et nos singulari prosequuntur charitate.

Proposueram animo corpusculum illud sanctissimum personali visitatione honorare, sed ingravente horrida iam hyeme et viarum asperitate, que saluti meae ex debili corporis compagine multum inimicatur propositum hoc meum usque ad Dominice Resurrectionis festa differendum opere precium duxi tunc etiam placato aere et Christo Iesu inter dirigente visitandi peregrinationem aggrediar et forte tunc canonizatio martyris tunc celebrata erit, licet apud me semper a die immanissime | mortis eius canonizatus extiterit.

Sum Feltri aliquot adhuc dies immoraturus. Si aliquid gratum iocundumque opera mei Vestre Dominationi effici potest, iubeat ut filio, ut servitori, quomodo mandata sua fideliter et solliciter exequar.

Felix et diu valeat Vestra Reverenda Dominatio, cui me totum trado.

Feltri, V novembris 1476.