February 10, 1477

Michele Carcano to Johannes Hinderbach

Original: Archivio di Stato di Trento, Archivio Principesco-vescovile, Sezione latina, capsa 69, n. 84, c 1r. Paper sheet in good conditions autograph of Michele Carcano with remains of sealing wax.

Reverendissime Pater in Christo ac Domine, Domine mi observandissime, salus Dominationi Vestre immortaliter.

Nuper ex presentium latore recepi litteras Dominationis Vestre mihi pro facto gratissimas ac periocundissimas. Cum prout ex eisdem percepi in hoc novello martyre Omnipotens Deus tam stupendi miraculorum prodigiis in dies magnificare non cesset gloriam suam. Neque in minimum existimo miraculum illarum trium mulierum hebrearum conversionem, quom antea ipsemet in sua perfidia obstinatissimas comprobaverim. Spero mirabilia in futurum videbimus. Cupio nihilominus aliquid boni percipere, quemadmodum in curia res bene agatur. Credo predicatorem, de quo scribit Dominatio Vestra, iam Tridento applicuisse. Non enim immemor huius provincie vicarius estitit promissi.

De Georgio nostro quid actum sit postquam ipsum populo huic veneto me predicante manifestum feci, a quo etiam non modicam suscepit elemosinam, iter postmodum versus Sanctam Mariam de Loreto dirigens nihil devenit ad aures, sed non modica ambiguitate teneor, ne et ipsi contigerit sicut et Lazaro quaterduano, quem nephandissimi iudei ex miraculi novitate invidia commoti querebant interficere.

Valeat igitur in Domino Dominatio Vestra, cuius omnibus me instantius commendo.

Ex Sancto Francisco a Vinea, Venetiis, decimo februarii 1477.

Eiusdem Vestre Dominationis servus minimus frater Michael de Mediolano Ordinis Minorum cum omnimoda commendatione.