March 24, 1478

Approvino degli Approvini to Johannes Hinderbach

Original: Archivio di Stato di Trento, Archivio Principesco-vescovile, Sezione latina, capsa 69, n. 119, c 1r. Paper sheet in good conditions autograph of Approvino degli Approvini with sealing wax seal. The cedula is kept in Archivio di Stato di Trento, Archivio Principesco-vescovile, Sezione latina, capsa 69, n. 122c, c 1r.

Reverendissime Pater et Domine colendissime, post mei devotam et humilem commendationem premissam, et cetera.

Heu infelix et afflictus! Quale michi in die Annuntiationis delatum est novum acerbum et omni dolore plenum, si sic foret, quod michi tamen persuadere non possum. Dum die mercurii in prandio essem, cardinalis sancti Marci palafrenarium suum ad me direxit quod statim ad dominationem suam acedere deberem; dimisso prandio pedester ad paternitatem suam me contuli. Illum satis preteritum profecto et mestum reperii in mensa vix comedere poterat et quasi lacrimando petiit a me si aliqua habuisse nova de Paternitas Vestra Reverendissima. Tunc dixi quod litteras de data XII presentis acceperam; tunc dixit Salamon iudeus adversarius pre Sancta Maria de Populo dum cardinales exirent hostendit certas litteras, hoc aliquibus cardinalibus. Qualem Cressonus de Rovredo sibi scripserat quod civitas capta erat per principem enim in omnibus fortiliciis et Paternitas Vestra in una camera detenta erat. Tunc dixi: «Paternitas Reverendissime, hoc est falsum, quia reverendissimus dominus meus cum illustrissimo domino principe est in bona amicitia et benevolentia, et quando aliquis vellet dominum meum offendere, princeps ipsum deffenderet».

Iudei vellent se paliare hoc modo, quia dicebat ille iudeus: «Ecce domini de peccato commisso per episcopum contra illos iudeos; Deus ostendit vindictam contra ipsum». Nec paternitas sua sibi persuadere poterat. Si ille Cressonus de Rovredo etiam Rovredi aliqua dixit falsa de causa nostra etiam ista scribere potest, sed policeor Paternitati Vestre Reverendissime, si poteri faciam penam luere illum falsa morem tam ex parte cause nostre quam Paternitatis Vestre Reverendissime et cuius interest ipsa diffamatio.

Supplico Paternitas Vestra quod statim memoreat de dictis. Accepi illa miracula et processus presbiteri Pauli et multas litteras, quibus plurimo dolore et mestitia nunc respondere non valeo, nec requie die noctu quod habeo nec habebo donec scripta manum Paternitatis Vestre Reverendissime videam. Nullum sit dubium de causa, quod determinatum est ut intellexit firmum et ratum erit et expediam si totus malus comeret et si mendicare deberem, et spero in primo concistoro, ut michi promissum est, et statim mittam copias autenticas. De hoc sit bone mentis.

Valeat feliciter in Domino Paternitas Vestra quam Deus omnipotens ad vota conservet.

Ex Urbe, die 24 martii 1478, raptissime cum multis lacrimis.

Tota curia est plena de Paternitate Vestra Reverendissima. Mitto unum boletinum domini Leonardi Contareni quem missit michi.

Vestre Reverendissime Paternitatis Fidelis et mestus Aprovinus de Aprovinis, et cetera.

Cedula

Dicunt quod <di>e 15 quidam capitaneus domini ducis cum magno exercitu incircuit Tridentum et capit castrum a omnis [.....] et potestas et episcopum, quem facit custodire in una camera in suprascripto castro. Item dicunt quod [.......] fuit in Rovredo et venit versus Romam propter hanc causam.

Littere iste fuerunt misse primum Venetias, cum litteris ab potestate, qui hoc scripsit domino nostro et inde eas habuit ipsa sala non per nunctium specialem. Dubito quod nos non sit. Nam, si aliud audivisset, signifecis mihi, et ego idem faciam erga nos. Deum rogo ut non sit, videlicet si Martinus Numpelaum non veniet infra duos dies, signum bonum erit.

Bene valetis.

Leonardus Contarenus, et cetera.